Սարի թաղի կալանավորված բնակիչների հարազատները բողոքի ակցիա են անում
 Սարի թաղում հուլիսի 19-ին տեղի ունեցած բախումների պատճառով կալանավորվածների հարազատներն այս պահին բողոքի ակցիա են անցկացնում ՀՀ-ում ԱՄՆ դեսպանատան դիմաց: Կալանավորվածներից Էդուարդ Զեյթունցյանի կինը՝ Լալա Բերնեցյանը MAMUL.am-ի թղթակցի հետ զրույցում տեղեկացրեց, որ բաց նամակ են հանձնելու դեսպանատանը: «Դրանից հետո երթով շարժվելու ենք Ֆրանսիայի դեսպանատուն, այնուհետև Ռուսաստանի և վերջում բաց նամակ ենք հանձնելու նախագահին: Բաց նամակի մեջ ներկայացրել ենք այն հիմնավորումները, ըստ որի` Սարի թաղի 10 բնակիչների անօրինական են կալանավորել և միջազգային կառուցներից պահանջում ենք, որպեսզի միջամտեն և կալանավորվածներին ազատ արձակեն»,- ասաց Բերնեցյանը: Անդրադառնալով Սարի թաղի գործով ընթացող դատական նիստերին` Բերնեցյանն ասաց, որ դրանք ձգձգվում են: «Այս պահին ոստիկաններն են ցուցմունք տալիս: Պետք է նշեմ, որ ցուցմունք տվող ոստիկաններից որևէ մեկը կալանավորվածներին չեն ճանաչել, նրանց դեպքի վայրում չեն տեսել, բայց այս ամենից հետո նրանց ազատ չեն արձակում»,- ասաց Բերնեցյանը: |
