Միջազգային

Ֆրանսիայում կենսաթոշակային բարեփոխումների դեմ ընդհանուր մոբիլիզացիայի մասնակիցները կրկին դուրս են եկել փողոցներ՝ արտահայտելու իրենց անհամաձայնությունը։ Ցույցերը սկսվել են 2019 թվականի դեկտեմբերի 5-ից: Ֆրանսիայի ՆԳՆ-ի տվյալներով՝ ամբողջ երկրում անցկացվող ցույցերին մասնակցել է 452 հազար մարդ, որոնցից 56 հազարը՝ միայն Փարիզում:

Մինչդեռ Ֆրանսիայի ամենամեծ արհմիությունը՝ Աշխատանքի գլխավոր դաշնակցությունը (CGT), ներկայացրել է այլ թվեր: Ըստ արհմիության՝ Ֆրանսիայում ցույցերին մասնակցել է առնվազն 1,7 միլիոն մարդ:

Փարիզում ցուցարարների երթը սկսվել է Հանրապետության հրապարակից դեպի Սուրբ Օգոստինյան հրապարակ՝ քաղաքի 8-րդ շրջանում: Ֆրանսիայի մայրաքաղաքում կարգուկանոնի պահպանման համար ներգրավվել է մոտ 5,5 հազար ոստիկան: Ցուցարարներին ցրելու համար ոստիկանությունը կիրառել է արցունքաբեր գազ: Իրավապահների և ցուցարարների միջև դիմակայությունը տևել է մոտ մեկ ժամ:
     Գործակալության տվյալներով՝ բախումների ընթացքում վիրավորվել է 20 ցուցարար և 16 իրավապահ:
     Արհմիությունների տվյալներով՝ ցույցեր անցկացվել են Ֆրանսիայի 90 քաղաքում՝ այդ թվում Բորդոյում, Լիոնում, Մարսելում, Ռուենում։