Քաղցրի պակաս ունենում են դեպրեսիայի մեջ գտնվող մարդիկ, զինծառայողներն ու սիրո կարիք ունեցող անձինք
 Բժշկական վերլուծության համաձայն` քաղցրի պակաս են ունենում հիմնականում դեպրեսիայի մեջ գտնվող մարդիկ, ինչպես նաև զինծառայողներն ու սիրո կարիք ունեցող անձինք: «Զինծառայողները չափազանց շատ էներգիա են ծախսում և լավ չեն սնվում, իսկ սովը բավարարելու ամենահեշտ ձևը` դա քաղցր օգտագործելն է»,- այս մասին ՄԱՄՈՒԼ.am-ի թղթակցին տեղեկացրեց սննդաբան Հասմիկ Աբովյանը: Իսկ սովորական մարդկանց մոտ, սննդաբանի խոսքով` անսովոր քաղցրի պահանջները տարբեր են: «Ամենագլխավոր պատճառն այն է, որ նրանք ունեն շատ մեծ քանակով կուտակված ինսուլին: Սկզբում մարդիկ քաղցրն ուտում են, նրանց մոտ շատ ինսուլին է արտադրվում, դա հանգեցնում է նրան, որ արյան շաքարը արագ ընկնում է, իսկ երբ արյան շաքարն ընկնում է, մարդը կատաղի սով է զգում և քաղցրի ու խմորի պահանջ է ունենում: Նա սկսում է ուտել քաղցր, ինչի հետևանքով նորից արտադրվում է ինսուլին, և պրոցեսն անընդհատ շարունակվում է: Քիչ-քիչ հյուսվածքները դառնում են ռեզիսդենդ, այսինքն` անընկալ այդ ինսուլինի հանդեպ»,- պարզաբանեց մասնագետը: Նրա խոսքով` այդ շատ քանակի ինսուիլինը, որն անընդհատ մարդուն ստիպում է քաղցածություն զգալ, նա տրամաբանորեն շարունակում է քաղցրն ուտել: Սննդաբանի բնորոշմամբ` գերնորմալ քաղցրի պահանջ ունենալու ամենահիմնական պատճառը ինսուլինի ավելցուկն է օրգանիզմում:  Իսկ հոգեբան Էլդա Գրինը կարծում է, որ քաղցրի պահանջ ունենալու պատճառը խիստ անհատական է, և տարածել բոլորի վրա պետք չէ: «Զինծառայողների մոտ սիրո, խնամքի ու մեղմ վերաբերմունքի պակաս կա, բայց կարծում եմ, դա ավելի շատ հոգեբանական խնդիր է, որը փորձում են լրացնել քաղցր ուտելով»,- ՄԱՄՈՒԼ.am-ի թղթակցի հետ զրույցում ասաց Էլդա Գրինը: «Պետք է նախ պարզել` դա հոգեբանական խնդիր է, թե` օրգանիզմի պահանջ: Դա շատ անհատական է»,- ամփոփեց հոգեբանը:  |
