Հարցազրույցներ

Նունե Եսայանը հայկական շոու-բիզնեսի այն երգչուհիներից է, որի մենահամերգների ժամանակ դահլիճը լեփ-լեցուն էր լինում: Այսօր նրան նկատում ենք շատ քիչ միջոցառումների, այն էլ հյուրի կարգավիճակում, պասիվ է նաև համացանցում: «Շատ բաներ չեմ տեղադրում, չեմ ասում: Նոր-նոր սկսել եմ «Ինստագրամ»-ում ակտիվանալ: Այդքան էլ չեմ սիրում դրանով զբաղվել: Երգեր ձայնագրվում են, երկու տեսահոլովակ նկարահանվեց «Տուր քո սերը ինձ» երգի հիման վրա և Սոսո Պավլիաշվիլի հետ դուետը: Համերգների հրավերներ տարբեր երկրներից լինում են, գնում եմ, պարզապես չեմ լուսաբանում: Բայց այսօր ամբողջ աշխարհում արդիական են կորպորատիվները: Համերգ տալը դարձել է անիմաստ: Չնայած ես համարում եմ, որ մի քանի տարին մեկ գեղեցիկ ու հետաքրքիր մի բան կարելի է անել: Հանրապետության հրապարակում համերգից հետո դեռ չեմ համարձակվում որևէ բան անել, որովհետև լինելուց պետք է ավելի մասշտաբային մի բան լինի»,- MAMUL.am լրատվականի թղթակցի հետ զրույցում ասաց երգչուհին:

Անդրադառնալով «Հայաստանի ձայնը» նախագծին, որտեղ նա հանդես է գալիս որպես մարզիչ, նշեց. «Երբ առաջարկեցին, դժվարությամբ համաձայնեցի՝ մտածելով, որ շատ ժամանակ կխլի, հետո եթերում անընդհատ երևալը... բայց հիմա շատ ուրախ եմ, որ համաձայնեցի: Այն մարդիկ, ովքեր միգուցե իմ, իմ արվեստի երկրպագուն չէին, հիմա բավականին նամակներ են գրում՝ նշելով, որ իրենց կարծիքը լրիվ փոխվել է: Մտածել են՝ գոռոզ եմ, մինչդեռ բնավորությամբ շատ շփվող չեմ: Բացի այդ շատ տաղանդավոր երեխաներ կան, թիմը շատ լավն է: Կարոտում եմ, անընդհատ ասում եմ՝ մի հատ չգա՞նք, հավաքվե՞նք: Քանի գնում՝ ավելի է հետաքրքրանում, հաղթելու փափագը շատ մեծ է ու, բնականաբար, յուրաքանչյուրն էլ ուզում է իր թիմը հաղթի, ու հիմա ամեն ինչ անում եմ այդ ուղղությամբ»,- եզրափակեց Նունե Եսայանը: