ԱՄՆ-ն և Հյուսիսային Կորեան պետք է դադարեցնեն փոխադարձ «խայթոցները» և ջանք թափեն` սկսելու նոր երկխոսություն, հայտարարել է Հարավային Կորեայի նախագահի` ազգային վերամիավորման և արտաքին քաղաքականության հարցով խորհրդական Մուն Չժոն Ինը: Այս մասին հաղորդում է ճապոնական «Asahi» թերթը:
Մուն Չժոն Ինը հիշեցրել է, որ Հյուսիսային Կորեան սպառնացել է չհամաձայնել երկխոսության գնալ այնքան ժամանակ, քանի դեռ ԱՄՆ-ն չի հրաժարվել իր թշնամական քաղաքականությունից Փհենյանի նկատմամբ. «Կորեայի Հանրապետությունը դեմ է Կորեական թերակղզում աճող լարվածությանը»,- հավաստիացրել է Հարավային Կորեայի նախագահի խորհրդականը: Սակայն, նա նշել է, որ երկխոսությանն ուղղված ջանքերը պահանջում են Միացյալ Նահանգների ներգրավումը:
Ըստ Մուն Չժոն Ինի՝ թեև Հարավային Կորեայի նախագահը հանդես է գալիս ամերիկա-հարավկորեական ռազմական դաշինքի ամրապնդման օգտին, նա, հավանաբար, ցանկանում է նվազեցնել կախվածությունն ԱՄՆ-ից` ձգտելով արագ փոխանցել ռազմական հրամանատարության գործառույթները Սեուլին` փաստացի ռազմական գործողությունների դեպքում:
Հյուսիսային Կորեան վախենում է Ամերիկայի սպառնալիքներից և ակտիվորեն լծված է միջուկային մարտագլխիկներով միջմայրցամաքային բալիստիկ հրթիռների ստեղծմամբ։
Սակայն դրանով ԿԺԴՀ-ն խախտում է միջուկային զենքի չտարածման ռեժիմն` իր վրա կրելով ՄԱԿ-ի Անվտանգության խորհրդի նոր պատժամիջոցները: