Միջազգային

Թուրքիայի արտգործնախարար Մեվլյութ Չավուշօղլուն այսօր, ԱՄՆ կատարած այցի շրջանակներում Վաշինգթոնի Քարնեգի կենտրոնում ունեցած ելույթի ժամանակ հայտարարել է, որ Անկարան մտադիր չէ հրաժարվել Երևանի հետ հարաբերությունների կարգավորման գործընթացից: «Մենք չենք կարող մեզ շքեղություն թույլ տալ և հրաժարվել (Հայաստանի հետ հարաբերությունների կարգավորումից), ոʹչ այս տարում, ոʹչ էլ` հետագայում»,- «Անադոլու»-ի հաղորդմամբ` ասել է Չավուշօղլուն:

Չավուշօղլուն իր ափսոսանքն է հայտնել այն հարցի վերաբերյալ, որ 1915թ. Օսմանյան կայսրության տիրապետության տակ գտնվող հայերի «մահվան» կապակցությամբ Թուրքիայի նախագահի ու վարչապետի կողմից հայտնած ցավակցության խոսքերը «Հայաստանի իշխանությունների կողմից արձագանքի չարժանացան»:

«Մենք ջանքեր ենք տանում երկու հին ժողովուրդների միջև գոյացած անդունդը հաղթահարելու ուղղությամբ, ժողովուրդներ, որ դարեր շարունակ ապրել են խաղաղ ու համերաշխ»,- ասել է Չավուշօղլուն: