Իրադարձություններ

«Հայաստանի մշակութային օրեր» միջոցառումների շրջանակում նոյեմբերի 22-ին Մոսկվայի նկարիչների տանը «Հայկական հոգու ձայնը» խորագրով համերգային ծրագրում կմիավորվեն հայկական դուդուկն ու ջազը: Համատեղ ելույթով հանդես կգան դուդուկի անվանի վարպետներ Ջիվան Գասպարյանը, Գևորգ Դաբաղյանը, Վահագն Հայրապետյանի ջազ կվինտետը, հայտնի այլ երաժիշտներ:
     «Ներկայացնելու ենք Կոմիտաս, Սայաթ Նովա, ժողովրդական ստեղծագործություններ: Ռուսաստանի հանդիսատեսի հետ մեր շփումն , իհարկե, առաջինը չէ: Ռուսները յուրահատուկ վերաբերմունք ունեն դուդուկի հանդեպ։ Մեր համերգներն այստեղ անցնում են լեփ-լեցուն դահլիճներում. հանդիսատեսը շունչը պահած լսում է դուդուկի երաժշտությունը: Համոզված եմ, որ նույն մթնոլորտը կտիրի նաև Մոսկվայի համերգին»,-ասաց ՀՀ ժողովրդական արտիստ Գևորգ Դաբաղյանը:
     ՀՀ մշակույթի նախարության փոխանցմամբ՝ մոսկովյան համերգից հետո երաժիշտը կմեկնի Իտալիա. նոյեմբերի 24-ին համերգով հանդես կգա Վենետիկում, իսկ 25-ին և 26-ին վարպետության դասեր կանցկացնի իտալացի երաժիշտների հետ: