Չեմպիոնների լիգայի խմբային փուլի 2-րդ տուրի շրջանակներում վաղը կայանալիք ԲԿՄԱ – «Մանչեսթր Յունայթեդ» հանդիպմանն ընդառաջ Հայաստանի հավաքականի ավագ Հենրիխ Մխիթարյանը խոսեց խաղից իր ակնկալիքների մասին։
«Վաղը պետք է ողջ հանդիպման ընթացքում կենտրոնացած լինենք։ Այն որ ԲԿՄԱ-ն հաղթել է «Բենֆիկա»-ին նշանակում է, որ նրանք ավելի արժանի էին։ Ես հետևում եմ ռուսական ֆուտբոլին, և, կարող եմ ասել, որ այս մրցաշրջանում ԲԿՄԱ-ն այլ խաղ է ցույց տալիս։ Թիմում փորձառու լավ խաղացողներ են։ Այս տարի թիմն ավելի ուժեղ է»։
Մխիթարյանը նշել է նաև, որ շատ կարևոր է տրիբունաներում հայ երկրպագուների աջակցությունը. «Անցած մրցաշրջանում հանդիպել ենք «Ռոստով»-ի հետ։ Շատ հաճելի է տրիբունաներում հայ երկրպագուներին տեսնելը։ Կարծում եմ՝ վաղը նրանք նույնպես կգան ինձ աջակցելու։ Կաշխատեմ անել հնարավոր ամեն ինչ՝ իրենց ուրախացնելու և գոլի հեղինակ դառնալու համար»։