Իրադարձություններ

Աշխարհի տարբեր քաղաքներում Հայոց ցեղասպանության զոհերի հիշատակին նվիրված միջոցառումներ են անցկացվում, որոնց միացել են մտավորականներ, հասարակական ու քաղաքական գործիչներ:
     Ֆրանսիայի Վալանս քաղաքի հայ համայնքի կազմակերպած միջոցառմանը մասնակցել են քաղաքի հայկական կազմակերպությունների անդամները: Քաղաքի հայ երիտասարդությունը ժողովրդական երգեր ու պարեր է կատարել, իսկ միջոցառումն ավարտվել է քաղաքի հայկական եկեղեցում աղոթքով:
     Ստամբուլում ևս տեղի հայ համայնքը միջոցառումների ակտիվ շարք է անցկացնում՝ նվիրված Ցեղասպանության զոհերի հիշատակին:
     Գլխավոր միջոցառումը կկայանա այսօր՝ օրվա երկրորդ կեսին. Ստամբուլի կենտրոնական Սուլթան Ահմեթ հրապարակում հայ համայնքը մոմավառությամբ ու նստացույցով հարգանքի տուրք կմատուցի անմեղ զոհերի հիշատակին: Նախատեսվում է, որ մոմավառությանը կմասնակցեն հայ, թուրք, քուրդ, հույն մտավորականներ, հասարակական գործիչներ, գրող-հրապարակախոսներ և մշակութային ու քաղաքական գործիչներ:
     Լոս Անջելեսում Հայոց ցեղասպանության 102-րդ տարելիցին նվիրված քայլերթ կանցկացվի, որին կմասնակցեն տասնյակ հազարավոր մարդիկ:
     Քայլերթը կսկսվի Պան Պասիֆիկ այգու մոտից, այնուհետթև երթի մասնակիցները կշարժվեն դեպի Թուրքիայի հյուպատոսությունորի մոտ ակցիայի մասնակիցները Հայոց ցեղասպանության ճանաչման պահանջով հանրահավաք կանցկացնեն:
     Հանրահավաքին նախատեսվում է Լոս Անջելեսի քաղաքապետ Էրիկ Գարսեթիի, ինչպես նաև՝ ԱՄՆ Կոնգրեսի Ներկայացուցիչների պալատի անդամ Ադամ Շիֆի ելույթները:
     Մոսկվայում` Գրողների տան մեծ դահլիճում, այսօր տեղի ունեցավ «Հիշում եմ և պահանջում» ոգեկոչման երեկոն, որը ևս նվիրված էր Հայոց ցեղասպանության 102–րդ տարելիցին: «Ցեղասպանության լավագույն պատասխանը հայոց պետականության և բանակի առկայությունն է»: Միջոցառման գեղարվեստական մասում հնչեցին հայ կոմպոզիտորների ստեղծագործություններ դաշնակահար Միքայել Հայրապետյանի, երգիչներ Գոհար Իսախանյանի և Ստանիսլավ Դավիդովի, Մոսկվայի «Դուդուկ» համույթի կատարմամբ: