«Ամեն նկարահանման օրն ավարտվում էր մեկ րոպե լռությամբ». «Երկրաշարժ» ֆիլմի հերոսները` պրեմիերայից հետո
 Սարիկ Անդրեասյանի մեծ աղմուկ բարձրացրած «Երկրաշարժ» ֆիլմի պրեմիերայից հետո հուզված էին նաև դերասանները: Հրանտ Թոխատյանը MAMUL.am-ի հետ զրույցում ասաց, որ նկարահանումների ընթացքում կարծես տեղափոխվել էր 88-ի Լենինական: «Նույն հուզումը կար նաև նկարահանման հրապարակում, նույնիսկ այն մարդկանց մոտ, ովքեր կադրից դուրս էին աշխատում: Սա այն եզակի դեպքերից էր, երբ նկարահանումների ողջ ընթացքում դերասաններից ոչ ոք հրապարակից չէր հեռանում, և ամեն նկարահանման օրն ավարտվում էր մեկ րոպե լռությամբ»,- պատմեց դերասանն, ով դժվարացավ առանձնացնել առավել բարդ տեսարանը, միայն նշեց, որ ֆիլմում իր մահվան տեսարանը թույլ չի տվել աղջկան դիտել:   Գրեթե մեկ տարվա բարդ և տաժանակիր աշխատանքի, և բազում անքուն գիշերների արդյունքում Հայկոյին հաջողվեց ստեղծել ֆիլմի համար ներդաշնակ երաժշտություն:  «Դժվար էր այս թեմային անդրադառնալը, բայց ստացվեց: Ամենակարևորը փորձել ենք այնպես անել, որ երաժշտության մեջ կյանք և հույս լինի: Առաջին նկարած կադրերից արդեն հասկացա` ինչ է պետք»,- մեզ հետ զրույցում պատմեց Հայկոն: Ֆիլմի ռեժիսոր Սարիկ Անդրեասյանն էլ նշեց, որ ֆիլմն ի սկզբանե չի ստեղծվել «Օսկար» ստանալու համար և կարևորը հանդիսատեսի գնահատականն է: «Կարևոր է բարդ բաների մասին պարզ լեզվով խոսելը»,- նշեց Սարիկ Անդրեասյանն, ում խոսքով` ֆիլմը նաև մարդասիրական կոչ էր դարի աղետների և պատերազմների ֆոնին:    |
