Սիրիայի հարցերով ԱՄՆ հատուկ ներկայացուցիչ Ջեյմս Ջեֆրիի կարծիքով՝ Թուրքիան չի հրաժարվի իր դիրքերից Սիրիայի Իդլիբ նահանգում, հակառակ դեպքում երկիրը կկանգնի փախստականների հոսքի առջև, որին նա ֆիզիկապես ի վիճակի չէ դիմակայել։ Այս մասին Ջեֆրին հայտնել է CBS-ին տված հարցազրույցում:
Ջեֆրին նաև պատասխանել է այն հարցին, թե արդյոք նա հավատում է, որ Իդլիբը կարող է անցնել Սիրիայի նախագահ Բաշար ալ-Ասադի կառավարության վերահսկողության տակ: «Ես չեմ կարծում, որ Ռուսաստանը և Ասադը կհաղթեն Իդլիբում, և պատճառն այն է, որ Թուրքիան չի կարող նահանջել, հակառակ դեպքում այնտեղ հասած 4 միլիոնից բացի կավելանա ևս 3 միլիոն փախստական։ Անկարայի իշխանությունները չեն կարողանա ֆիզիկապես հաղթահարել այս հարցը»,- նշել է Ջեֆրին: