Իրադարձություններ

     «Լուսավոր Հայաստան» կուսակցության ղեկավար Էդմոն Մարուքյանը լրագրողների հետ զրույցում քիչ առաջ ասաց, որ իրենք նիստերի ընթացքում պարզելու են, թե ովքեր են եղել հուշագիրը խախտողները: ««Լուսավոր Հայաստանի» 10 անդամների համար մենք պատասխանատվություն ենք կրում, մենք գիտենք, թե նրանք ում են քվեարկել: Իսկ Ասլանյանին կողմ քվեարկողներն առաջիկա նիստերին կբացահայտվեն: Մի բան կարող եմ ասել, որ քաղաքական համակարգը տեռորի տակ է գտնվում, դատախազությունից մարդ են էստեղ բերել ու ավագանու անդամներին ճնշում էին, վախեցնում քրեական գործ հարուցել, եթե Ասլանյանի օգտին չքվեարկեն: Ուղղակի եղավ այն, ինչ եղավ, իսկ այդ ամենը մեր կողմից անընդունելի է»,- ասաց Մարուքյանը:
    
     Հիշեցնենք` Վանաձորում ավագանին այսօր քաղաքապետ էր ընտրում: «Լուսավոր Հայաստան», «Հայկական վերածնունդ», «Բարգավաճ Հայաստան» կուսակցությունները համատեղ հայտարարությամբ էին հանդես եկել և պաշտպանելու էին «Լուսավոր Հայաստանի» ցուցակը գլխավորող Քրիստ Մարուքյանին: Վերջինը մինչ քվեարկությունը լրագրողներին ասել էր, թե մտավախություն չունի, որ անդամներից որևէ մեկին ՀՀԿ-ն ճնշած կլինի: Թե ովքեր էին ավագանու անդամները, ովքեր դրժեցին որոշումը, պարզ չէ: