Վաշինգթոնը Մոսկվա է ուղղել սիրիական հակամարտության կարգավորման իր «վերջին առաջարկը», հաղորդում է Washington Post-ը՝ հղում անելով ԱՄՆ նախագահ Բարաք Օբամայի վարչակազմի իր աղբյուրներին:
Պարբերականի զրուցակիցների խոսքով` ուղերձում ԱՄՆ-ը համարյա վերջնագիր է ներկայացրել Ռուսաստանին: Ամերիկացիները հայտարարել են, որ սիրիական հակամարտության հարցում իրենց համբերությունն սպառվում է:
Washington Post-ի տվյալներով` ամերիկյան պլանը մի քանի կետ է ներառում: Դրանցից գլխավորը Սիրիայում լիակատար զինադադար հայտարարելն է: Վաշինգթոնն առաջարկում է նաև դադարեցնել սիրիական օդուժի բոլոր թռիչքներն ու սկսել ահաբեկիչների դեմ Ռուսաստանի և ԱՄՆ-ի համատեղ օդային գործողությունները:
Ընդ որում, թերթը նշում է, որ Սպիտակ տան իր աղբյուրները չեն հստակեցրել, թե ինչ է հետևելու այն դեպքում, եթե այս առաջարկների շուրջ ևս չհաջողվի համաձայնության գալ: