Ինչպես արդեն տեղեկացրել ենք, Խորենացի փողոցում քաղաքացիները սնունդ են բերում, որպեսզի ԱԺ «Ժառանգություն» խմբակցության պատգամավոր Զարուհի Փոստանջյանը փորձի ՊՊԾ գնդի տարածք հասցնել այն: «Դեռևս սնունդ ներս տանել մեզ չի հաջողվել, ոստիկանները չեն թույլատրում: Այս ձևով փորձում են նրանց սննդազուրկ անել»,- ասաց «Մենք ենք տերը մեր երկրի» նախաձեռնության անդամներից Կարեն Հայրապետյանը: Նա տեղեկացրեց, որ իրենք հացադուլ են անելու. «Մենք պետք է հայտարարենք համազգային հացադուլ և գործադուլ, այսպիսով գուցե վախենան և թույլ տան սնունդ փոխանցել»,- ասաց մեր զրուցակիցը: ՀՀ մարդու իրավունքների պաշտպանի մամուլի խոսնակ Զոհրապ Եգանյանից հետաքրքրվեցինք, թե ինչ է անում ՀՀ մարդու իրավունքների պաշտպանը «Սասնա ծռերին» սնունդով ապահովելու հարցում։ Նա տեղեկացրեց, որ ՄԻՊ-ի գործառույթների մեջ չի մտնում ՊՊԾ գնդի տարածքում գտնվողների սննդի ապահովման հարցի լուծումը: «ՀՀ մարդու իրավունքների պաշտպանը գործում է «Մարդու իրավունքների պաշտպանի մասին» ՀՀ օրենքով սահմանված կարգավիճակի սահմաններում: Պաշտպանի՝ օրենքում ամրագրված լիազորությունների շրջանակը սպառիչ է և դրանց թվում նման իրավիճակներում իրավապահ մարմինների կողմից իրականացվող հատուկ միջոցառումներին միջամտության որևէ հնարավորություն նախատեսված չէ: Հուլիսի 17-ից իրադարձություններին հետևում են, այցելում են անձանց բերման ենթարկելու կամ ձերբակալելու վայրեր, բժշկական հաստատություններ, հիմքերի առկայության դեպքում ոստիկանության ծառայողների պատասխանատվության ենթարկելու հարց են բարձրացում»,- տեղեկացրեց Եգանյանը: