Ստամբուլի հայերը գոհունակությամբ իրենց հաղթանակն են տոնում, քանի որ այնտեղի հայկական «Արմեն» ճամբար-որբանոցի քանդման գործընթացը դադարեցվել է: Ինչպես հաղորդում է «Հուրիյեթ»-ը, այն վերադարձվել է հայերին:
Աղբյուրը նշում է, որ ճամբար-որբանոցը, որտեղ ժամանակին ապրել են նաև հայտնի լրագրող Հրանտ Դինքն ու նրա կինը, սեփականատիրոջ որոշմամբ որպես նվիրատվություն հանձնվելու է տեղի Հայկական հիմնադրամին:
«Արմեն» ճամբար-որբանոցի քանդման գործընթացը մեկնարկել էր մայիսի 6-ին, սակայն բողոքների արդյունքում այն ժամանակավորապես դադարեցվել էր: Ճամբարի քանդման գործընթացի ամբողջական դադարեցման համար Ստամբուլում ակտիվորեն պայքարում էր «Նոր Զարթոնք» շարժումը, որի անդամները հայտարարել էին, որ իրենք չեն նահանջելու այնքան ժամանակ, մինչև ճամբարը չհանձնվի օրինական տերերին: Պայքարին միացել էին նաև ամերիկահայերը: Ամերիկայի Հայ դատի հանձնախումբը նույիսկ արշավ էր սկսել՝ կոչ անելով Կոնգրեսին պահանջել, որ Թուրքիան անհապաղ դադարեցնի Ստամբուլում հայկական «Արմեն» ճամբարի քանդման գործընթացը: