«Ովքեր հասկանում են երաժշտությունից, այդ թվում ճանաչված երկրներից շատ մարդիկ, ոչ մի նմանություն կամ պլագիատա այս երգի մեջ չեն գտնում և շարունակում են Մհերի հետ աշխատել: Նրանցից մեկը Նադեժդա Սարգսյանն է... կամ Վահրամ Պետրոսյանը, որը գրել է Կամիլի երգը, եթե իրենք զանգում և ողջունում են լավագույն երգի համար, նշանակում է՝ ոչ մի պլագիատ չկա, եթե կրկնվում է ինչ-որ մի բառ՝ «Forever» կամ մեկ ուրիշ բառ, դա չի նշանակում պլագիատ»,- MAMUL.am-ի թղթակցի հետ զրույցում՝ անդրադառնալով Մհերի՝ «Դեպի Եվրոտեսիլ» նախագծին ներկայացրած «Forever» երգին, որը մեծ աղմուկ էր բարձրացրել համացանցում, ասաց նրա պրոդյուսեր Գեորգի Հարությունյանը: Օգտատերերը պնդում են, որ երաժշտություն ու բառերը շատ նման են աշխարհահռչակ «Queen» խմբի «Who Wants to Live Forever» ստեղծագործությանը:
«Պլագիատ կլիներ, եթե կրկնվեր ոչ թե բառ, այլ երգի մաս, իսկ այստեղ ոչ մի բառ չի կրկնվում: Բացի դրանից՝ ինչպես ասել է հանրաճանաչ դիրիժորներից մեկն՝ այս աշխարհում 7 հատ նոտա է, ոնց էլ լինի, ինչ-որ մի բան մի տեղ կրկնվելու է: Իսկ ես ձեզ հավաստիացնում եմ, որ այս երգը նոր է, ոչ մի պլագիատ նրա մեջ չկա»,- շարունակեց պրոդյուսերը:
«Աղմկող» օգտատերերի մասին էլ մեր զրուցակիցն այսպես արտահայտվեց. «Պարզ է՝ չուզող մարդիկ շատ կան, քանի որ մեր ազգին բնորոշ է փնովել այն, ինչը լավագույնն է»: