Իրադարձություններ

     Արդեն մի քանի օր մամուլում ու համացանցում քննարկվում է առևտրականների բողոքը՝ Վրաստանից 5 կգ-ից ավելի մանդարին ու ցիտրուսային այլ մրգեր առանց մաքսազերծման ներկրելու արգելքի հետ կապված:
     ՊԵԿ-ի պարզաբանման մեջ նշվում է, որ ֆիզիկական անձանց կողմից 5 կգ-ից ավելի (մինչև 50 կգ) մրգերի, բանջարեղենի ներմուծումը ՀՀ տարածք կարող է թույլատրվել բացառապես բուսասանիտարական հավաստագրի առկայության և դրա` մաքսային մարմիններին ներկայացման դեպքում:
     Ընդդիմադիր պատգամավոր Նիկոլ Փաշինյանը ՊԵԿ-ի որոշման վերաբերյալ օրեր առաջ հայտարարել էր. «4 կգ փաստաթուղթ՝ Վրաստանից 5 կգ-ից ավելի մանդարին ներկրելու համար: Վրաստանի հետ ունենք ազատ առևտրի համաձայնագիր, բայց դրա համար պետք է լինի ֆիտոսանիտարական, միջուկային, քիմիական, կենսաբանական տեղեկանք: Մարդը 1000 դրամի մանդարին պետք է գնի Սադախլուից, 5000 դրամ ծախսի, գնա Թիֆլիս, փաստաթուղթ ձեռք բերի, գա Հայաստան»:
     ՊԵԿ-ի նոր որոշման վերաբերյալ Ալավերդիի առևտրականներն «Անկյուն+3» ՀԸ տեսանյութում ասում են. «Ռաստամոժկեն եթե անենք, մանդարինը կլինի 900 դրամ, ո՞վ կառնի: Երկու կիլո կոռոլյոկի համար 50 հոգի ջեբները լցնում են, որ անցկացնեն: Դա տամոժնի չի, խայտառակ վիճակ ա: Եթե մանդարինն արժի 100 դրամ, ո՞նց կարող է իր գնից երկու անգամ ավելի մուծվի, չի լինի տենց: Խի՞ Ռուսաստանում, Վրաստանում տենց չեն անում»: «Նախորդ տարի ոչ միայն մեզ, այլ բարեկամների համար էինք մատչելի գներով բերում, մի փոքր էլ՝ վաճառում, բայց էս տարի հնարավոր չէ... Ստիպված գինը պտի բարձրանա ժողովրդի համար, ի՞նչ արած»,- բողոքում են նրանք: