Ակնկալվում է, որ Եվրոխորհրդարանը սեպտեմբերին «դեմ» կքվեարկի Թուրքիայի համար առանց վիզայի ռեժիմի տրամադրմանը՝ ռազմական հեղաշրջման փորձին երկրի իշխանությունների արձագանքի պատճառով: Այս մասին հայտնում է РИА Новости-ն՝ հենվելով Եվրոխորհրդարանի աղբյուրին:
«Ամենայն հավանականությամբ, Եվրոխորհրդարանը «դեմ» կքվեարկի Թուրքիայի համար առանց վիզայի ռեժիմի տրամադրմանը»,- ասել է գործակալության զրուցակիցը:
Ներքին գործերի, միգրացիայի և քաղաքացիության հարցերով եվրոհանձնակատար Դիմիտրոս Ավրամոպուլոսն ավելի վաղ հայտարարել էր, որ Թուրքիային, ինչպես նախկինում, մնում է կատարել 5 պայման, որոնք անհրաժեշտ են Եվրոպայի կողմից վիզային ռեժիմը չեղարկելու համար: Վիզայի չեղարկման համար Թուրքիան պետք է կատարի 72 պայման, որոնք նախատեսված են վիզայի ազատականացման ծրագրով:
Եվրոհանձնաժողովը մայիսին Եվրոխորհրդարանին և ԵՄ Խորհրդին առաջարկել է վերացնել վիզային սահմանափակումները Թուրքիայի քաղաքացիների համար, եթե Անկարան մինչև հունիսի վերջը կատարի վիզայի չեղարկման համար մնացած պայմանները: Դրանց թվում են՝ կոռուպցիայի կանխարգելման ուղղությամբ միջոցառումները, Եվրոպոլի հետ օպերատիվ համաձայնագրի մասին բանակցությունները, ԵՄ բոլոր անդամ-երկրների հետ դատական համագործակցությունը, ահաբեկչության դեմ պայքարի մասին օրենսդրության վերանայումը: