Համացանց

«Ապրելու երկիր» կուսակցությունը հայտարարություն է տարածել. «2020 թվականի Արցախյան 44-օրյա պատերազմն իր ողբերգական ելքով մեր դարավոր պատմության ամենադառն էջերից է։
     Մեկ անգամ չէ, որ հայ ժողովուրդը ստիպված հաղթահարել է համազգային աղետն ու ճգնաժամը։
     Բայց այսօր մենք ունենք պետություն, ունենք պետականություն։ Եվ մենք ուղղակի պարտավոր ենք ամուր կառչել մեր պետականությունից, պարտավոր ենք գնահատել այն։
     Մեր պետականության հիմքն Արցախն է, և յուրաքանչյուր հայ պետք է իմանա, որ մեր ինքնության, արժանապատվության և պետության ակունքները հենց Արցախում են։
     Արցախից է սկսելու մեր արժեքների վերաիմաստավորումն ու խորքային փոփոխությունների մեկնարկը։ Արցախը չի հանձնվելու, և մենք չենք հանձնվելու։
     Արցախը մենք բոլորս ենք։ Եվ մեր ժողովուրդն այնքան խոհեմություն ու իմաստություն պետք է ունենա, որ հասկանա՝ Արցախը մեր արժանապատվությունն է։ Մենք պարզապես պարտավոր ենք դա գիտակցել, վերապրել և առաջ շարժվել։
     Ամեն տարի նոյեմբերի 9-ը հիշեցում է և կոչ. կոչ՝ սթափվելու, կոչ՝ հզորանալու և ոտքի կանգնելու։ Մեր ապրած ամեն օրով յուրաքանչյուրս պետք է հաշվետու լինենք, թե ինչ ենք արել նախորդ 365 օրերի ընթացքում մեր կյանքն արժանվույն և հայրենանվեր ապրելու համար։
     44-օրյա պատերազմի, դրանից առաջ և դրանից հետո տեղի ունեցած բոլոր բախումների հետևանքով զոհված հերոս տղաների կյանքի գնով մեզ բաժին հասած հայրենիքի ամեն կտորի համար բոլորս ենք պարտավոր պայքարել, աշխատել ամեն օր, աընդհատ, նվիրված ու պատասխանատու»։