ԱՄՆ-ն ու «Թալիբան» շարժումը քննարկում են ամռան կեսերին ամերիկյան զորքերի դուրս բերման ավարտի հնարավորությունը: Ավելի վաղ վերջնաժամկետ էր նշվում սեպտեմբերի կեսը: Աֆղանական «Պոլո նյուզ» հեռուստաընկերությունը, հղում անելով իր աղբյուրներին, նշում է, որ բանակցությունների համար Քաբուլ է եկել ԱՄՆ-ի՝ Աֆղանստանի հարցերով հատուկ ներկայացուցիչ Զալմայ Հալիլզադը: Թալիբներին չի գոհացրել նախնական վերջնաժամկետը՝ սեպտեմբերի 11-ը, ուստի այժմ քննարկվում է նոր ժամկետ: Ենթադրաբար, հուլիսի կեսերին ամերիկյան զորքերը պետք է արդեն լքած լինեն Աֆղանստանը:
Նաև պայմանավորվածություն է ձեռք բերվել, որ եթե կողմերն այս հարցով համաձայնության գան, ապա «Թալիբան»-ը պատրաստ կլինի մասնակցություն ունենալ Թուրքիայում կայանալիք միջազգային խորհրդաժողովին՝ Աֆղանստանում իրավիճակի կարգավորման հարցի վերաբերյալ: