ԱՄՆ-ը պետք է օգնի Արցախի անմեղ քաղաքացիներին՝ բնակվելու սեփական հողի վրա. կոնգրեսական
 ԱՄՆ Կոնգրեսի հայկական հարցերով հանձնաժողովի համանախագահ Ֆրանկ Փալոնեն կարծում է, որ այսօր՝ Հայոց ցեղասպանությունից 106 տարի անց, նմանօրինակ գործողություններն աշխարհի տարբեր կետերում շարունակվում են: Այս մասին նա խոսել է «Արմենպրես»-ին տրամադրված ուղերձում: Նախորդ տարվա նոյեմբերին Լեռնային Ղարաբաղում տեղի ունեցած պատերազմը, որի ընթացքում Արցախի դեմ հարձակման ժամանակ նոր կոտորածներ կազմակերպվեցին ադրբեջանցիների և թուրքերի կողմից, մեզ հիշեցրեց, որ խնդիրն անցյալում չի մնացել»,- նշել է Փալոնեն՝ ընդգծելով, որ պատերազմի ընթացքում հայերի դեմ անմարդկային վերաբերմունք է ցուցաբերվել, ռմբակոծվել են քաղաքացիական բնակավայրեր: «Կարծում եմ՝ ԱՄՆ-ն այստեղ ավելի առանցքային դերակատարում պետք է ունենա՝ վերջ տալով ագրեսիային, թուրքերի ծավալապաշտական նկրտումներին: Նա պետք է օգնի Արցախի անմեղ քաղաքացիներին՝ բնակվելու սեփական հողի վրա: ԱՄՆ նախկին վարչակազմի օրոք Միացյալ Նահանգներն ասես «ձեռքերը լվացել էր» տարածաշրջանից, և կարծում եմ՝ հենց դա էր գլխավոր պատճառներից մեկը, թե ինչու թուրքերն ու ադրբեջանցիները որոշեցին հարձակվել Արցախի վրա»,- հայտարարել է Փալոնեն: Նա հիշեցրել է, որ ավելի քան հարյուր կոնգրեսականների ստորագրությամբ նամակ են ուղարկել ԱՄՆ նախագահ Բայդենին՝ կոչ անելով օգտագործել դիվանագիտական բոլոր հնարավոր գործիքները Թուրքիայի և Ադրբեջանի դեմ պատժամիջոցներ կիրառելու նպատակով: |
