Այսօր Ադրբեջանում անցկացվում է սահմանադրական փոփոխությունների հանրաքվե, որն ընդդիմադիրների համոզմամբ` Իլհամ Ալիևի գերդաստանի դիրքերն ավելի ամրապնդելու և փաստացի իշխանությունը ժառանգաբար փոխանցելու նպատակ ունի:
Սահմանադրության փոփոխությունների փաթեթը ներկայացրել է հենց Ալիևը: Այն ենթադրում է երկրի հիմնական օրենքի 29 հոդվածների փոփոխություն: Դրանցից ամենաառանցքայիններն են` նախագահի պաշտոնավարման ժամկետի երկարաձգում` 5-ից հասցնելով 7 տարվա, նախագահ առաջադրվելու համար առնվազն 35 տարեկան լինելու պահանջի չեղարկում և փոխնախագահների պաշտոնների սահմանում:
Փոխնախագահներին առաջադրելու է նախագահը: Իսկ եթե նախագահը չկարողանա կատարել պարտավորությունները, դրանք կստանձնի ոչ թե վարչապետն, ինչպես սահմանված է ներկայիս օրենքով, այլ՝ առաջին փոխնախագահը:
Իշխանության բոլոր լծակներն իր ձեռքում պահելու համար Ալիևն իր առաջարկած փաթեթում ներմուծել է նաև օրենսդիր մարմինը՝ Միլի մեջլիսը ցրելու և նախագահի արտահերթ ընտրություններ նշանակելու իրավունք:
Քաղաքացիները ներկայիս 25-ի փոխարեն կստանան 18 տարեկանում Միլի մեջլիսի պատգամավոր ընտրվելու իրավունք:
Սահմանադրական փոփոխությունների հետ կապված տևական ժամանակ է` Ադրբեջանում չեն դադարում ընդդիմության կազմակերպած բողոքի ակցիաները, որոնք ինչպես միշտ, ճնշվում են ոստիկանության կողմից: