Հուլիսի 6-ին Տաթևի վանքի բակում Ռոլան Հայրապետյանի ղեկավարած Musicatreize անսամբլը, Ֆրանսիայի ռադիոյի պատանեկան երգչախումբն ու Տաթևի վանքի մանկական երգչախումբն առաջին անգամ միասին կատարել են «Արշակի երգը» ստեղծագործությունը։ «Արշակի երգը» պատմում է մարդկային լեզվի կորստի մասին և թե ինչպես են մարդիկ փորձում փրկել բառերն անհետացումից։
Մինչ համերգը, Ֆրանսիայի ռադոյի պատանեկան երգչախումբը վարպետության դասեր է անցկացրել Տաթևի երգչախմբի համար։ Համերգի փորձերն ու վարպետության դասերն անցկացվել են Երևանում՝ Շառլ Ազնավուրի տուն-թանգարանում։
Բացօթյա պրեմիերային ներկա էին Տաթևի և հարակից համայնքների բնակիչներ, զբոսաշրջիկներ, որոնք շուրջ մեկ ժամ վայելել ենՏաթևի սաների ու ֆրանսիացի երաժիշտների համատեղ ելույթը։
«Արշակի երգ» ստեղծագործությունը հուլիսի 7-ին ներկայացվել է նաև Դիլիջանում։ Միջոցառմանը ներկա են գտնվել Հայաստանում Ֆրանսիայի դեսպան Ջոնաթան Լակոտը, Դիլիջանի բնակիչներ, զբոսաշրջիկներ։
«Արշակի երգ»-ի ֆրանսիական պրեմիերան տեղի է ունենալու այս տարվա նոյեմբերին Փարիզում՝ Ֆրանսիայի ռադիոյի մեծ համերգասրահում։
Նշենք, որ «Արշակի երգը» երաժշտության հեղինակն է ֆրանսիահայ կոմպոզիտոր Միշել Պետրոսյանը, ստեղծագործության խոսքերը գրել է հանրահայտ ֆրանսիացի գրող Լորան Գոդեն: