«Ծառուկյան» խմբակցության պատգամավոր Նաիրա Զոհրաբյանն ԱԺ արտահերթ նիստի ժամանակ վրդովվեց, թե նախորդից եկող խայտառակ, արատավոր ավանդույթը շարունակվում է. «Քաղաքական տարվա ավարտին` դեկտեմբերին, բոլոր կառավարությունները շըփ-թըփ բերում և նախագծերը դակում են` հենվելով մեծամասնության ալարելու վրա: Այսօր էլ շատերն ասում են` արագ վերջացրեք, դակենք, ավարտենք: Չեք տալիս հնարավորություն` նախագծերը մանրամասն քննարկելու: Պարոʹն Արամյան, եթե հիշում եք, հարկային փաթեթի քննարկան ժամանակ մեզ մեղադրում էին, որ մենք չենք ուզում հարկային խաղի արդար կանոններ սահմանել: Բա արդար կանոնները սահմանել էիք` թողեիք աշխատեր: Երբ որ այն ժամանակ մենք ասում էինք` խնդրահարույց է, որ վիճելի է, դուք մտածում էիք, որ մենակ դուք եք խելոք, մենակ դուք եք հասկանում, էստեղ նստած մարդիկ որևէ բան չեն հասկանում: Բա որ էդքան խելոք էիք էդ ինչի՞ եք հիմա բերում` օրենքը ուժի մեջ չմտած նորից փորձում խաղի կանոն փոխել. Կաʹմ ինչ-որ հատուկ մազոխիզմով եք տառապում, տպավորությունն այդպիսին է, կներեք, կաʹմ, ուղղակի, չգիտեք՝ ո՞ր խաղի կանոնն ա արդար, կաʹմ էլ ուղղակիորեն, ամեն անգամ, փորձում եք խաղի կանոնը հարմարեցնել ձեր ներքին խաղի կանոններին»,- հայտարարեց Ն. Զոհրաբյանը:
Պատգամավորի ելույթից հետո ընթացակարգը դրվեց քվեարկության ու ընդունվեց 50 կողմ, 30 դեմ ձայների հարաբերակցությամբ: