Միջազգային

Երեկ Վերսալի Մեծ Տրիանոն պալատում հանդիպել են Ֆրանսիայի նախագահ Էմանուել Մակրոնն ու ՌԴ նախագահ Վլադիմիր Պուտինը: Հանդիպումը տևել է մեկ ժամից ավելի, ինչից հետո նախագահները հանդես են եկել մամուլի ասուլիսով:
     Էմանուել Մակրոնը հայտարարել է, որ ուկրաինական ճգնաժամի սրման դեպքում Ռուսաստանի հանդեպ նոր պատժամիջոցներ կկիրառվեն, իսկ Պուտինը համոզմունք է հայտնել, որ նոր պատժամիջոցները ոչ մի կերպ չեն մերձեցնի Կիևի հետ և խաղաղություն չեն բերի:
     Այցի նախապատրաստական շրջանում Ֆրանսիայի նախագահը հայտարարել է, որ հանդես է գալու պահանջողի դիրքերից: Իր հանդիպումը Պուտինի հետ Մակրոնը բնութագրել է «երկխոսություն և պահանջկոտություն» բառերով:
     Երկու երկրների համար ցավոտ թեմաներ են համարվում ուկրաինական և սիրիական ճգնաժամերը: Մակրոնը հայտարարել է, որ մտադիր է խաղաղության հասնել Դոնբասում և «ժողովրդավարական բարեփոխումների»` Սիրիայում: Ըստ Ֆրանսիայի նախագահի` Սիրիայում քիմիական զենքի հերթական կիրառումը կդառնա այն «կարմիր գիծը», որն անցնել ոչ մեկին թույլատրված չէ:
     Մակրոնը հայտարարել է նաև, որ ռուսական երկու լրատվականների` RT-ին և Sputnik-ին, արգելված է եղել մուտք գործել իր նախընտրական շտաբ, քանի որ այդ լրատվականները կեղծ տեղեկատվություն և զրպարտություններ են տարածում և ազդեցության ու քարոզչության գործիքներ են: