Ռուսաստանն առաջին անգամ երկրի սահմաններից դուրս է հանել C-380 ՎՄ «Անթեյ-2500» ժամանակակից զենիթահրթիռային համալիրները: Այդ մասին հայտնել է Fox News հեռուստաալիքը` հղում անելով ամերիկյան աղբյուրներին:
Զենքով բեռներն անցած հանգստյան օրերին առաքվել են Միջերկրական ծովի Տարտուս սիրիական նավահանգիստ, որտեղ գտնվում է ռուսական ռազմածովային բազան: Նշվում է, որ տեխնիկան դեռ չի բեռնաթափվել և գտնվում է կոնտեյներներում:
Հաղորդվում է, որ C-380 ՎՄ-երը վտանգ են ներկայացնում ԱՄՆ-ի և նրա դաշնակիցների թևավոր հրթիռների համար: Դրանք նաև նախատեսված են ինքնաթիռների և փոքր ու միջին հեռավորության բալիստիկ հրթիռների դեմ պայքարի համար: «Անթեյ-2500» զենիթահրթիռային համալիրները կարող է խոցել 250 կմ հեռավորության վրա գտնվող թիրախներ:
Լրատվականի աղբյուրը տարակուսանք է հայտնել` նշելով. «Ոʹչ ԴԱԻՇ-ը, ոչ «Ջեբհաթ ան-Նուսրա»-ն չունեն ռազմական ինքնաթիռներ, այնպես չէ՞»:
Հիշեցնենք, որ ավելի վաղ Ռուսաստանը Սիրիայում տեղակայել էր հակաօդային պաշտպանության С-400 համակարգեր: