Ալեքսեյ Նավալնին բժշկական կոմայից դուրս գալուց հետո գրեթե ամբողջությամբ վերականգնվել է, գրել են Der Spiegel-ը, The Insider-ը և Bellingcat-ը: Նա արդեն կարող է ասել, թե ինչ է տեղի ունեցել թունավորումից առաջ:
Այդ կապակցությամբ Գերմանիայի ոստիկանությունն ուժեղացրել է քաղաքական գործչի պաշտպանությունը՝ վախենալով, որ դա կարող է նոր մահափորձի առիթ դառնալ։
Նավալնին արդեն վերականգնվել է այն աստիճան, որ կարողացել է հիշել թունավորմանը նախորդող իրադարձությունները: Նավալնու մոտ սկսել են այցելուներ թողնել, թեև նախկինում նրան կարող էր տեսակցել միայն կինը:
«Բժիշկների կարծիքով՝ Նավալնիին ֆիզիկապես կհաջողվի վերականգնվել առնվազն 90%-ով, իսկ հոգեպես նա արդեն վերականգնվել է գրեթե ամբողջությամբ»,- գրել է The Insider-ը:
Spiegel-ը Նավալնիի վիճակի բարելավումը կապում է անվտանգության ուժեղացման հետ: «Նրա հայտարարությունները կարող են վտանգավոր լինել հարձակման հետևում կանգնած մարդկանց համար»,- պնդել է պարբերականը:
Նավալնիի վիճակը շատ ավելի արագ է բարելավվում, քան այլ մարդկանց մոտ, որոնք ենթադրաբար թունավորվել են «Նովիչոկ»-ով, այս մասին գրել են ԶԼՄ-ները։
Նավալնին հոսպիտալացվել Է օգոստոսի 20-ին, սեպտեմբերի 7-ին նրան դուրս են բերել բժշկական կոմայից: