ԱՄՆ Միսուրի նահանգի Սենթ Լուիս քաղաքի դատարանը պարտավորեցրել է կենցաղային քիմիական ապրանքների արտադրությամբ զբաղվող Johnson & Johnson ընկերությանը 110 մլն դոլար փոխհատուցում վճարել կնոջն, ով քաղցկեղով է հիվանդացել ընկերության՝ տալկ պարունակող ցանափոշու օգտագործումից:
Ինչպես նշում է Reuters-ը, կինը դատարանում տեղեկացրել է, որ 40 տարի շարունակ ամեն օր օգտագործել է J&J-ի արտադրության՝ տալկ պարունակող ցանափոշին:
Դրա հետևանքով 2012թ. կնոջ մոտ ձվարանների քաղցկեղ է ախտորոշվել, ինչից հետո չարորակ ուռուցքը տարածվել է լյարդի վրա: Ներկայում կինը քիմիաթերապիայի կուրս է անցնում:
Այս ամենը հաշվի առնելով՝ դատարանը վճռել է, որ ընկերությունը պետք է 110 մլն դոլարի փոխհատուցում վճարի կնոջը:
J&J-ն իր ցավակցությունն է հայտնել կնոջն ու հայտարարել, որ մտադիր է բողոքարկել վճիռը:
Սենթ Լուիսի դատարանում J&J-ի դեմ նմանատիպ 2.400 հայց է ներկայացվել:
Հիշեցնենք, որ սա արդեն 4-րդ հայցն է, որով Johnson & Johnson-ին պարտավորեցնում են փոխհատուցում վճարել տալկի հիմքով ստեղծված ցանափոշու պատճառով: 2016-ի հոկտեմբերին ընկերությանը պարտավորեցրել են 70 միլիոն դոլարի փոխհատուցում վճարել Քալիֆորնիայի բնակչուհուն, իսկ դրան նախորդած 2 դեպքում ընկերությանը պարտավորեցրել են վճարել 127 միլիոն դոլար: