ՌԴ և ԱՄՆ նախագահներ Վլադիմիր Պուտինն ու Բարաք Օբաման հանձնարարել են արտաքին քաղաքական գերատեսչությունների ղեկավարներ Սերգեյ Լավրովին ու Ջոն Քերիին հանդիպել և շարունակել Սիրիայի հարցով համաձայնագրի շուրջ տարվող աշխատանքը: Այս մասին հաղորդում է Reuters լրատվական գործակալությունը՝ հղում անելով ամերիկյան աշխատակազմի բարձրաստիճան ներկայացուցչին:
«Եթե համաձայնագիրը հնարավոր է ձեռք բերել, մենք ուզում ենք շատ շտապ անել դա՝ հումանիտար իրավիճակի պատճառով»,- ասել է գործակալության զրուցակիցը: «Եթե մենք չենք կարող հասնել այդ տեսակի համաձայնագրի, որը մենք ուզում ենք, մենք հետ կկանգնենք այդ փորձից»,- ավելացրել է նա:
Չինաստանի Հանչժոու քաղաքում անցկացվող G20-ի գագաթնաժողովի շրջանակում այսօր մեկնարկել է ԱՄՆ և ՌԴ նախագահների հանդիպումը:
Հիշեցնենք` նախագահները կարճատև շփումներ էին ունեցել նաև երեկ` պայմանավորվելով այսօրվա առանձին հանդիպման մասին:
Ավելի վաղ տեղի է ունեցել նաև Լավրով-Քերի հանդիպումը: Ռուսաստանը և ԱՄՆ-ն դեռևս չեն կարողանում համաձայնության գալ Սիրիայի հարցով գործարքի վերաբերյալ: ԱՄՆ պետքարտուղարությունից հայտնել են, որ տարաձայնություններ կան: