«Տիտանիկ»-ի նավաբեկությունից փրկված հայ երիտասարդը վերապրել է նաև Հայոց ցեղասպանությունը
20-րդ դարի խոշորագույն աղետը` «Տիտանիկ»-ի նավաբեկությունն, ավելի քան 1500 մարդու կյանք է խլել: Այդ զոհերի թվում եղել են նաև հայեր: Տարբեր տվյալներով` տխրահռչակ նավարկության տոմս է ձեռք բերել 7-12 հայ, որոնց մի մասը փախել է Արևմտյան Հայաստանից` թուրքական ճնշումներից փրկվելու համար: «Տիտանիկ»-ի նավաբեկությունից հետո ողջ է մնացել 3-4 հայ, որոնցից մեկը գրականագետ, հրապարակախոս Վաղինակ Բյուրաթն է եղել, այս մասին գրում է Sputnik-ը: Կոնստանդնուպոլիսի հայկական ինտելիգենցիայի ամենավառ ներկայացուցիչներից մեկը` Վաղինակ Բյուրաթն իր հոր` Սմբատի հետ գրահրատարակչությամբ է զբաղվելիս եղել: Այդ ժամանակ նա 26 տարեկան է եղել և պատրաստվել է մեկնել Ամերիկա` գրքերի մեծ խմբաքանակ տեղափոխելու համար: Նա մեծ դժվարությամբ, օգտագործելով հոր կապերը, կարողացել է իրավունք ստանալ: Նա մեկնել է Մանչեսթեր, որտեղից էլ` Սաութհեմփթոն, որտեղ էլ Ամերիկա մեկնելու համար «Տիտանիկ»-ի տոմս է ձեռք բերել: 1912թ. ապրիլի 14-ի լույս 15-ի գիշերը Վաղինակը պայթյունի նման մի բան է լսել: Սենյակում լույսը հանգել է, անգլիացի երիտասարդներն, ովքեր պառկած են եղել երկհարկանի մահճակալների վերին հարկում, ընկել են գետնին ու վնասվածքներ ստացել: Մորենն ու Վաղինակն օգնել են անգլիացիներին ու նրանց դուրս հանել տախտակամած: Նավի վրա կատարյալ քաոս է տիրել, ու փրկվելու հույսով Վաղինակն ու Մորենը որոշել են ցատկել ջուրը: Բարեբախտաբար, երկուսն էլ լավ լողորդներ են եղել: Իր իրերից Վաղինակը վերցրել է միայն անձնագիրն ու գումարը, փաթաթել փոքրիկ պարկի մեջ ու կախել վզից: Երիտասարդները հայտնվել են անծայրածիր օվկիանոսում: Վաղինակը բավական երկար ժամանակ լողալուց հետո նավակ է նկատել ու օգնություն խնդրել, բայց օգնության փոխարեն նրան հարվածել են նավաթիակով: Դրանից հետո նա գիտակցության է եկել հիվանդանոցում: |