ՌԴ Պաշտպանության նախարար Սերգեյ Շոյգուն այսօր` Մոսկվայի ժամանակով 10:00-ին (Երևանի ժամանակով` 11:00), հայտարարել է, որ Ռուսաստանն ու Սիրիան դադարեցնում է Հալեպի հրթիռակոծումը: Այս մասին հաղորդում է ТАСС-ը: Շոյգուի խոսքերով` ռազմական գործողությունների ժամանակից շուտ դադարեցումը կապված է հոկտեմբերի 20-ին նախանշված «մարդասիրական դադարի» համար:
Նշենք, որ ՄԱԿ-ում ՌԴ մշտական ներկայացուցիչ Վիտալի Չուրկինը լույս 18-ի գիշերը հայտարարել է, որ Հալեպում հրադադարի պահպանման ռեժիմը կարող է մշտական դառնալ, եթե հաջողվի հստակորեն սահմանազատել չափավոր ընդդիմության և ահաբեկչական կազմակերպությունների ուժերը:
Հիշեցնենք, որ Արևմուտքը սպառնացել է ռազմական հանցագործություն որակել ռուսաստանյան օդուժի կողմից Հալեպի հրթիռակոծումն ու հայտարարել է ՌԴ հանդեպ նոր պատժամիջոցների սահմանման մտադրության մասին: