Ուկրաինական «Սեգոդնյա» լրատվականի ծավալուն անդրադարձը Հայոց ցեղասպանությանը
Ուկրաինական «Սեգոդնյա» լրատվականը ծավալուն հոդվածով անդրադարձել է Հայոց ցեղասպանության 100-ամյա տարելիցին: Ավելի քան 20 տարի Երևանը տարբեր հարթակներով, ներառյալ նաև ՄԱԿ, ձգտում է հասնել Հայոց ցեղասպանության համաշխարհային ճանաչման: Այսօր Հայոց ցեղասպանությունը ճանաչել է 20 երկիր: Վերջինը եղել է Վատիկանը (դրանից հետո Հայոց ցեղասպանությունը ճանաչեց նաև Ավստրիան): Հայաստանն աշխատանքներ է տարել նաև Մեծ Բրիտանիայի հետ. հնագույն համընդհանուր հանրագիտարանում` «Encyclopedia Britannica»-ում, խմբագրվել է «Թուրք-հայկական պատմություն» հոդվածը: «Հայերի ջարդեր» բառակապակցությունն այժմ վերաձևակերպվել է «Հայոց ցեղասպանություն»: Ողբերգական տարելիցին ընդառաջ հայկական կողմը նոր մոտեցում է մշակել` «Հիշում և պահանջում ենք» կարգախոսով, որը կոչված է միջազգային հանրությանն ապացուցելու, որ Ցեղասպանության ճանաչումն անհրաժեշտություն է: 100-ամյա տարելիցի միջոցառումների կազմակերպչական աշխատանքներում ներգրավված են հայ հասարակության և սփյուռքի բոլոր շերտերը` երկրի նախագահից և հայ միլիոնատերներից մինչև ծրագրավորողներ և հուշանվերներ վաճառողներ: Բացի այդ, հայերը ողբերգական փաստերին ծանոթանալու նպատակով «Ցեղասպանություն-1915» խորագրով ցուցահանդես են կազմակերպել, որի միջոցով ներկայացվել են լուսանկարներ և այդ տարիների ԶԼՄ-ների առաջին էջերի անդրադարձերը ողբերգական դեպքերին: Այնտեղ, որտեղ հնարավոր չի եղել հասնել ցուցահանդեսի միջոցով, ակտիվորեն գովազդվել է «armeniangenocide100.org» կայքը, որով 5 լեզվով, ներառյալ թուրքերեն, կարելի է ծանոթանալ ոչ միայն փաստաթղթերին, այլև վերապրածների թոռների ու ծոռների պատմություններին: … Ցեղասպանության խորհրդանիշ դարձած անմոռուկ ծաղիկը պատկերող վահանակներ են տեղադրվել աշխարհի տարբեր քաղաքներում, նաև՝ Կիևում, Օդեսայում, Դնեպրոպետրովսկում»: Լրատվականի ծավալուն անդրադարձում խոսվում է նաև գործարար Ռուբեն Վարդանյանի գլխավորությամբ ստեղծված սեփական «Նոբելյան մրցանակի»` «Ավրորա»-ի, ճարտարապետների ու պատմաբանների կողմից ստեղծված «Մշակութային ցեղասպանություն» ծրագրերի մասին: «Ում համար սուգ, ում համար շքերթ» վերտառությամբ` ուկրաինական լրատվականն անդրադարձ է կատարել նաև Թուրքիայի նախագահի կողմից ապրիլի 24-ին Գալիպոլիի հաղթանակի կապակցությամբ տոնական միջոցառումներ կազմակերպելու փաստին: |