Համացանց

Քաղաքագետ Սուրեն Սուրենյանցը գրում է. «Մենք դեռ կարող ենք խուսափել մեծ աղետից՝ Փաշինյանով կամ առանց նրա
     Հայաստանի ներկայիս խորհրդարանը սոցիալ- պոպուլիստների և նացիոնալ- պոպուլիստների հավաքական է, որը տարբեր պատճառներով չի գնալու Ադրբեջանի ու Թուրքիայի հետ հարաբերությունների կարգավորմանը:
     Իհարկե, ես չեմ ուզում պատասխանատվությունը տարալուծել:
     Այն, որ բանակցային գործընթացը փակուղում է ու Հայաստանը և Ադրբեջանը կանգնած են նոր պատերազմի շեմին՝ հայաստանյան դերակատարներից թիվ մեկ պատասխանատուն Նիկոլ Փաշինյանն է:
     Գիտեմ, որ «ազգային տրենդից» դուրս բան եմ ասում, բայց պնդում եմ՝ Բրյուսելի և Մոսկվայի վերջին բանակցությունները տապալվել են Փաշինյանի «փախուստի» հետևանքով:
     Սա ճշմարտություն է, եթե նույնիսկ տարբեր կողմերից փորձեն ինձ թիրախավորել:
     Ես Փաշինյանին մեղադրում եմ ոչ թե 44-օրյա պատերազմում պարտվելու, այլ պատերազմի սանձազերծմանը նպաստելու համար:
     Ես Փաշինյանին մեղադրում եմ ոչ թե «Արցախը չի կարող լինել Ադրբեջանի կազմում» էժանագին կարգախոսը չարտաբերելու, այլ խաղաղության գործընթացը սեփական իշխանության պահպանմանը զոհաբերելու համար:
     Մենք դեռ կարող ենք խուսափել մեծ աղետից, եթե քաղաքական ու հանրային մեծ ճնշում բանեցնենք Փաշինյանի վրա՝ ստիպելով վերջինս գնալ Ադրբեջանի հետ հարաբերությունների կարգավորման:
     Հապաղելու ժամանակ չունենք, յուրաքանչյուր ձգձգված օրը նոր աղետ է ուրվագծում մեր ժողովրդի համար:
     Եթե Փաշինյանն այս ճշմարտությունը ստորադասում է իր մասնավոր քաղաքական շահերին, ապա հարաբերությունների կարգավորման պետք է գնալ՝ նրան իշխանությունից հեռացնելով»: