Ռուս հեռուստահաղորդավարուհի Քսենյա Սոբչակը կասկածյալի կարգավիճակում է հայտնվել «Ռոստեկ» պետական կորպորացիայից շորթման գործով, հայտնում են ռուսական լրատվամիջոցները՝ վկայակոչելով իրավապահ մարմինների աղբյուրը։
Ըստ աղբյուրի՝ Սոբչակը կասկածվում է առանձնապես խոշոր չափերով գույք ձեռք բերելու նպատակով շորթման մեջ (ՌԴ Քրեական օրենսգրքի 163-րդ հոդվածի 3-րդ մասի «բ» կետ)։ Սա պատժվում է մինչև 15 տարվա ազատազրկմամբ։
Հոկտեմբերի 26-ին խուզարկություն է կատարվել Քսենյա Սոբչակի ամառանոցում։ Այս տեղեկությունից կարճ ժամանակ անց լրատվամիջոցները հայտնեցին, որ Սոբչակը շտապ լքել է Ռուսաստանը։ Իրավապահները Սոբչակին բերման ենթարկելու՝ քննիչի որոշում են ունեցել։
Հոկտեմբերի 25-ին շորթման կասկածանքով բերման է ենթարկվել Sobchak's Caution Media մեդիա հոլդինգի կոմերցիոն տնօրեն Կիրիլ Սուխանովը։ Նրա հետ միասին կալանավորվել է Tatler ամսագրի նախկին գլխավոր խմբագիր Արիան Ռոմանովսկին (Կուզմին)։ Հոկտեմբերի 26-ին նրան մեղադրանք է առաջադրվել առանձնապես խոշոր չափերով շորթման համար։