Իրաքի ամենամեծ քաղաքական ուժերից մեկի՝ Մուկթադա աս-Սադրի իմամի և առաջնորդի կողմնակիցները գրոհում են Բաղդադի Հանրապետության և նախագահական պալատները, հայտնում է Al Arabiya-ն։
Մի քանի ժամ առաջ Մուկթադա աս-Սադրը հայտարարեց քաղաքականությունից հեռանալու մասին։ Այս լուրը խիստ զայրացրել է նրա կողմնակիցներին։ Նրանք մտել են Բաղդադի Կանաչ գոտի։ Ցուցարարները ներխուժել են Հանրապետական պալատ, որտեղ նստած է Իրաքի կառավարությունը։ Դեպքի վայրում են հատուկ ծառայությունները։
Մայրաքաղաքի կանաչ գոտին, որտեղ կենտրոնացված են կառավարական բոլոր շենքերը, արգելափակված է։ Բաղդադում պարետային ժամ է հայտարարվել:
Առաջիկա ժամերին իշխանություններն ակնկալում են հակամարտության սրացում։ Մզկիթները «ընդհանուր մոբիլիզացիա» են հայտարարել՝ ի նշան համերաշխության ալ-Սադրի հետ։ Դրա շնորհիվ Իրաքի շատ շրջաններում իմամի աջակցության ցույցեր կանցկացվեն։ Հյուսիսային Բասրա քաղաքում ցուցարարները փակել են ճանապարհները և այրել անվադողեր։
Ինչպես նշեցինք, այսօր Իրաքի ամենամեծ քաղաքական ուժերից մեկի ղեկավարը և շիա ազդեցիկ իմամ Մուկթադա աս-Սադրը հայտարարեց քաղաքականությունից հեռանալու և Սաադրիստական բոլոր հաստատությունների փակման մասին: Իմամն ակնարկել է, որ իր կյանքին վտանգ է սպառնում իր առաջարկած բարեփոխումների պատճառով: Մուկթադա աս-Սադրը խնդրել է իր կողմնակիցներին աղոթել իր համար, եթե ինքը մահանա: