«Պատիվ ունեմ» դաշինքի վարչապետի թեկնածու Արթուր Վանեցյանը նույնպես կատարեց իր ընտրությունը՝ Երևանի ընտրատեղամասերից մեկում:
Լրագրողների հետ զրույցում հայտնեց, որ ընտրությունը կատարել է հանուն Արցախի և Հայաստանի ապագայի:
«Այսօր ուղղակի ընտրություններ չեն: Այսօր Հայաստանի լինելու-չլինելու ընտրությունն է»,- ասաց նա:
Անդրադառնալով իրենց դաշինքի նկատմամբ իրավապահների գործողություններին՝ Վանեցյանը նշեց. «Իշխանության բոլոր քայլերը միտված են ընդդիմության դիրքերը թուլացնելուն: Նրանք հասկանում են, որ ՀՀ-ում այլևս երբեք վերարտադրվելու կամ իշխանություն կազմելու հնարավորություն չունեն, ուստի վերջին ճիգերն են գործադրում՝ իրենց իշխանական աթոռներից կառչած մնալու համար»:
Հարցին, թե հետընտրական ի՞նչ զարգացումներ է սպասում, Վանեցյանն ասաց. «Գիտեք, ընդդիմությունը չէ դրա պատասխանատուն, այլ՝ իշխանությունը: Կարծում եմ՝ ոչ մի հետընտրական զարգացում չի լինի, որովհետև ընտրությունների արդյունքները կփաստեն, թե ՀՀ-ում ով է կազմելու իշխանություն»: