Կիպրոսն արգելափակել է Եվրոմիության կողմից Բելառուսի դեմ պատժամիջոցների ընդունումը, հայտնել է Bloomberg-ը։
Պարբերականի տեղեկություններով՝ Կիպրոսը չի համաձայնել Մինսկի նկատմամբ առաջարկված միջոցներին՝ ձգտելով ԵՄ-ի պատժամիջոցների ցուցակում ներառել թուրքական յոթ ընկերությունների, որոնք մասնակցել են Կիպրոսի տնտեսական գոտում բնական գազի արդյունահանման աշխատանքներին: Բելառուսի դեմ պատժամիջոցների ընդունման համար անհրաժեշտ է Եվրոմիության բոլոր՝ 27 երկրների համաձայնությունը։
Ավելի վաղ ԵՄ-ն հայտարարել էր, որ Բելառուսում տեղի ունեցած նախագահական ընտրություններն արդար և ազատ չեն, ինչպես նաև հրաժարվել է ճանաչել դրանց արդյունքները: Բացի այդ, Եվրոմիության առաջնորդները պայմանավորվել են առանձին պատժամիջոցներ սահմանել Մինսկի նկատմամբ՝ ցուցարարների դեմ բռնություն կիրառելու համար: Բելառուս 30 պաշտոնյաների համար մուտքի արգելք են սահմանել Էստոնիան, Լատվիան և Լիտվան: