Միջազգային

Unaoil նավթագազային ընկերության նախկին աշխատակիցներ Սայրուս ու Սաման Ահսանիներն իրենց մեղավոր են ճանաչել Ադրբեջանում, Ղազախստանում ու մի շարք այլ երկրներում պետական ծառայողներին կաշառք տալու համար։ Այս մասին հոկտեմբերի 31-ին հաղորդել է Reuters գործակալությունը՝ վկայակոչելով ԱՄՆ արդարադատության նախարարությանը: Նշվում է, որ Մեծ Բրիտանիայի քաղաքացիները դատարանի առջև կկանգնեն 2020 թվականի ապրիլի 20-ին: Երկու գործարարներն էլ կասկածվում են «Արտասահմանում կոռուպցիայի մասին օրենքը խախտելու մեջ» (FCPA):

Նշվում է, որ օգոստոսին Մեծ Բրիտանիայի 50-ամյա քաղաքացի Սթիվեն Հանթերը, ով նախկինում աշխատել է Unaoil-ում որպես բիզնեսի զարգացման գծով տնօրեն, նույնպես խոստովանել է, որ խախտել է այս օրենքը:

Ըստ ԱՄՆ գանձարանի, Ահսանիներն ընդունել են պետական պաշտոնյաներին կաշառք տալու դեպքերն Ալժիրում, Անգոլայում, Ադրբեջանում, Կոնգոյում, Իրանում, Իրաքում, Ղազախստանում, Լիբիայում և Սիրիայում 1999 թվականից մինչև 2016 թվականը: