Հայկական բնապահպանական ճակատ (ՀԲՃ) քաղաքացիական նախաձեռնության ֆեյսբուքյան էջում հաղորդագրություն է տարածվել. «Ապարանի տարածաշրջանի Արագած գյուղի բնակիչները շարունակում են ահազանգել Գեղարոտ գետի վրա գործող երկու փոքր ՀԷԿ-երի պատճառով առաջացած խնդիրների մասին։ Գյուղի ոռոգման միակ աղբյուր հանդիսացող գետը մոտ 10 կմ հոսում է ՓՀԷԿ-երի խողովակներով, ինչի արդյունքում ջուրը չի հասցնում ինքնամաքրվել և այս վիճակով է հասնում գյուղացիներին։
Գյուղից մեզ փոխանցեցին, որ հունիսի 6-ին վաղ առավոտվանից իրենք ակցիա են իրականացնելու այս խնդիրը լուծելու պահանջով, քանի որ ոռոգման սեզոնը սկսվում է, և իրենք չեն ուզում հերթական անգամ փչացնել իրենց բերքը։
Լուսանկարներն արել են տեղացիները 2019թ․ հունիսի 4-ին։
ՀԲՃ-ն մի քանի տարի է բարձրաձայնում է այս գյուղի, Գեղարոտ գետի և ՓՀԷԿ-երի խնդիրների մասին, բայց, ցավոք, լուծումներ դեռ չեն գտնվել»։