«Ես էի արգելել հոլովել «Դոդի Գագո» կնիքը». 3 տարի առաջ այս օրը
2015 թվականի փետրվարի 12-ի ՀՀԿ նիստում Սերժ Սարգսյանը հանդես եկավ սկանդալային հայտարարությամբ՝ նոր իրավիճակ ստեղծելով քաղաքական դաշտում: «Գագիկ Ծառուկյան քաղաքական դերակատարը մեր երկրի համար դարձել է չարիք»,- ասաց ՀՀԿ նախագահը: Ստորև՝ ելույթից մի հատված. «Ողբերգություն է, ինչ-որ տեղ նաև զավեշտ է, որ Գագիկ Ծառուկյանը քաղաքական մեծ հավակնություններ ունի: Վստահաբար նրա շրջապատի գրագետ մարդիկ նույնպես հոգու խորքում հասկանում են, որ այս տեսակի՝ պատերազմող երկրի քաղաքական էլիտայի մաս հանդիսանալը իրական վտանգ է: Պատկերացնո՞ւմ եք մի իրավիճակ, երբ Ծառուկյանը ԵԽ խորհրդարանական վեհաժողովում տեքստ է կարդում, որին հաջորդում են պատգամավորների, այդ թվում նաև թուրք և ադրբեջանցի պատգամավորների, հարցերը: Այո՛, պատկերացնելը շատ բարդ է և սոսկալի, իհարկե... Սերժ Սարգսյանի այս հայտարարությանն ի պատասխան՝ հաջորդ օրը հրապարակվեց ԲՀԿ առաջնորդի ելույթը: Անդրադառնալով իր հասցեին հնչած անձնական վիրավորանքներին՝ Ծառուկյանն ասաց, որ «չի իջնելու նման ցածր մակարդակի». «Ուզում եմ բացել բոլոր փակագծերը և լինել անկեղծ։ Ինձ առաջարկվել են համագործակցության բազմաթիվ տարբերակներ, անձնական շահեկան առաջարկներ, այդ թվում՝ նախագահի պաշտոնը սահմանադրությունը փոխելուց հետո` մեկ պայմանով, որ ես համաձայնեմ իր իշխանության վերարտադրությանը։ Այսինքն՝ աջակցեմ փաստացի երրորդ ժամկետով և ցմահ կառավարելու իր ցանկության իրականացմանը՝ սահմանադրական փոփոխությունների միջոցով։ Ես կտրականապես մերժեցի այս հակապետական մոտեցումը, քանզի Հայաստանի հետընթացն ապահոված մարդը չի կարող նման հավակնություններ ունենալ: Ահա իմ այս դիրքորոշումն էլ հանդիսացավ հիմնական պատճառը, որ նա խախտի քաղաքական և մարդկային հարաբերությունների կանոնները: Սա՛ է իրականությունը և ոչինչ ավելին»,- մասնավորապես ասել էր Գագիկ Ծառուկյանը: |