ԱՄՆ Պետդեպարտամենտը հավանություն է տվել Վրաստանին 75 միլիոն դոլարի չափով Javelin հրթիռային համակարգերի հնարավոր վաճառքին: Վերջնական որոշումը կկայացնի ԱՄՆ Կոնգրեսը: Այս մասին հայտնել է Պենտագոնի կառույցում ներառված՝ անվտանգության ոլորտում համագործակցության հարցերով գործակալությունը, գրում է ekhokavkaza-ն:
Համապատասխան առաջարկը Կոնգրեսին էր փոխանցվել նոյեմբերի 17-ին: Գործակալության տեղեկություններով՝ Վրաստանն ավելի վաղ Javelin 410 հակատանկային հրթիռային համակարգեր և 72 հրամատարային համակարգեր էր խնդրել, պայմանագիրը նաև նախատեսում է մատակարարում, ուսուցում և այլ սպասարկում:
Պենտագոնում նշել են, որ Javelin համակարգը կբարձրացնի պաշտպանական ոլորտում Վրաստանի հնարավորությունները, սակայն չի խախտի տարածաշրջանում ռազմական ուժի հիմնական հավասարակշռությունը: