ՀԱԿ պատգամավոր Գագիկ Ջհանգիրյանը 2015 թվականի տարեկան բյուջեի քննարկման ժամանակ հայտարարեց, թե քննարկումները շատ ձանձրալի են, քանի դեռ չեն տրվում պատասխաններ, թե որքան է բյուջեի ծախսման արդյունավետությունը.«Դատախազությանը, դատական մարմիններին որքան գումար տաս, այնքան էլ կծախսեն, բայց պետք է հասկանալ` որքան արդյունավետ են ծախսվում այդ գումարները»:
Ջհանգիրյանն անդրադարձավ մեքենաների կրճատման գործընթացին և առաջարկեց, որ կրճատված ծառայողական մեքենաները ոչ թե վաճառել, այլ տրվեն օպերատիվ աշխատանք իրականացնող մարմիններին: «Եթե կառավարությունը գնալու է ինչ-որ ոլորտներում ավելորդ մեքենաների կրճատումների, թող դրանք տրամադրի օպերատիվ հետախուզական մարմիններին, որովհետև նրանց գործը տրանսպորտի հետ ամենաշատն է կապված: Եթե ցանկանում եք, որ նրանք տաք հետքերով բացահայտեն դեպքերը, ապա պետք է ունենան միջոցներ: Կան նախարարություններ, որոնց տրանսպորտ անհրաժեշտ չէ, կամ քիչ է անհրաժեշտ, բայց օպերատիվ հետախուզական մարմիններին ոչ միայն տրանսպորտ է պետք, այլև տրանսպորտային ծախսեր` բենզին, անվադող, պահեստամասեր: Այնինչ շատ ժամանակ աշխատողներն իրենք են իրենց միջոցների հաշվին լուծում բենզինի, անվադողերի խնդիրը»,- ասաց Ջհանգիրյանը: