Ամերիկայի Հայ դատի հանձնախումբն արշավ է սկսել՝ կոչ անելով Կոնգրեսին պահանջել, որ Թուրքիան անհապաղ դադարեցնի Ստամբուլում հայկական «Արմեն» ճամբարի քանդման գործընթացը: Ինչպես հաղորդում է «Asbarez»-ը, մինչև 1983թ. շատ հայ մանուկների համար որպես մանկատուն ծառայած այդ շինությունը Թուրքիայի իշխանություններն այժմ որոշել են քանդել՝ տեղը վիլլա կառուցելու համար: Շինությունը քանդելու գործընթացը սկսվել էր մայիսի 6-ին, սակայն բողոքի ցույցերի արդյունքում այն ժամանակավորապես դադարեցվել էր:
Աղբյուրը նշում է, որ հանձնախումբը կոչ է արել հանրությանն օգտվել այն հանգմանքից, որ քանդման գործընթացը դադարեցված է և դիմել սենատորներին և Կոնգրեսի ներկայացուցիչներին:
Հայ դատի հանձնախումբն այդ առիթով իր հայտարարության մեջ նշել է. «Այս դադարը և թուրքական լրատվամիջոցների կենտրոնացումն այս հարցի վրա կարող է հնարավորություն ընձեռել ԱՄՆ ղեկավարությանը պահանջել Թուրքիայից չքանդել մշակութային և կրոնական ինքնության այդ կենտրոնը»: