«ՀՀ քաղաքացիական դատավարության օրենսգրքի փոփոխությունների» մասին օրինագծի քննարկման ժամանակ քիչ առաջ ելույթ ունեցավ ԱԺ ԲՀԿ խմբակցության ղեկավար Նաիրա Զոհրաբյանը:
Հիշեցնենք` նախագծով առաջարկվում է, որ դատական վեճերը հաշտեցնելու համար հաշտարարներ աշխատեն, որը կարող է լինել ցանկացած մարդ՝ համապատասխան որակավորում ստանալուց հետո:
«Սրանով դատավորներն իրենց կից ստեղծելու են սեփական հաշտարարների կլուբներ ու ինչպես նշեցին իմ գործընկերները, հաշտարարական ատկատների մեխանիզմն է սկսելու աշխատել. ատկատի սկզբունքով գործերը մատակարարելու են անձնական հաշտարարներին: Ամեն գաղափար չէ, որ պետք է պատճենել միջազգայինից ու իրականացնել, եկեք մտածենք դատական համակարգի անկախության մասին»,- ասաց Ն. Զոհրաբյանը:
Ավելի վաղ, խոսելով օրինագծի մասին, ՀԱԿ-ից Գագիկ Ջհանգիրյանը ևս
մտահոգություններ էր հայտնել. «Չդառնա, որ մի դատավոր ունենա հինգ հաշտարար ու սա նրանց պաս տա, կիսվեն: Սրա մասին պետք է մտածենք, որ բաշխումն ավտոմատ համակարգով լինի, այբբենականով լինի ու հաշտարարների թիվը մեծ լինի»,- ասել էր պատգամավորը: