Արվեստի վաստակավոր գործիչ, ռեժիսոր Արմեն Էլբակյանը կարծում է, որ Եղեռնի վերաբերյալ բոլոր տեսակի ստեղծագործությունները չպիտի նպատակ ունենան լացացնելու, վախեցնելու կամ խղճահարություն առաջացնելու: «Խիստ կարևոր է, որ նրանք մտածելու և խորհելու առիթ տան հանդիսատեսին, հասկանալու, թե ինչպե՞ս պետք է ապրենք, այսուհետ, մանավանդ` 100 տարի անց,- ՄԱՄՈՒԼ.am-ի թղթակցի հետ զրույցում նշեց ռեժիսորը:
Նրա փոխանցմամբ` Էդգար Էլբակյանի անվան թատրոնը Խամաճիկների թատրոնի հետ համատեղ պատրաստում է Ցեղասպանության թեմայով մի նոր ներկայացում:
«Դա մի վարկած է այն ամենի մասին, ինչ մենք բոլորս գիտենք, բայց կլինի մի ներկայացում` «Հետաքննություն», որով, կարծես մենք այսօր հետադարձ հայացք ենք նետելու, և հետաքննելու ենք այդ ամբողջ եղեռնագործության պրոցեսը, հայերի ընդվզումը, հայերի հաղթող մարդու դիրք ունենալու կարողությունն ու դրա կրողը լինելու խնդիրը»,-ասաց Արմեն Էլբակյանը: Նրա խոսքով` թատրոնում արդեն աշխատանքները սկսվել են: «Եթե ամեն ինչ լինի այնպես ինչպես ծրագրել ենք, հնարավոր է հունիս կամ մայիս ամսին հանձնենք հանդիսատեսի դատին: Ինձ համար բոլորովին նշանակություն չունի, թե որ օրերին բեմադրությունը կհանձնենք և կխաղանք: Ինձ համար խիստ կարևոր է ունենալ խաղացանկում այդպիսի ներկայացում, մի գործ, որի միջոցով մենք կմտնենք հանդիսատեսի հետ երկխոսության մեջ»,- խոստովանեց ռեժիսորն, ում համար սա խիստ կարևոր խնդիր է, որը պետք է անապայման բարձրացվի բեմ` անկախ նրանից ապրիլի 24-ի համար է, թե` ոչ: «Ի վերջո, մենք պետք է հասկանանք, թե ովքե՞ր են եղել մեր հերոսները` Սասունցի Դավթից, Մեծ Մհերից ու Փոքր Մհերից սկսած, և ինչպիսին պիտի լինի մեր միջի հերոսը, որ կարողանանք փոխանցել մեզնից հետո եկողներին»,- ամփոփեց Արմեն Էլբակյանը: