«Գուգլ» ընկերության ղեկավար Էրիկ Շմիդտը Դավոսում ընթացող համաշխարհային տնտեսական ֆորումի ժամանակ հայտարարել է, որ համացանցի օրերը հաշված են այն առումով, որ դրա գոյության մասին շուտով բոլորը կմոռանան: Այդ մասին գրում է «Դեյլի Մեյլ»-ը: «Համացանցը կանհետանա: Այնքան շատ «IP» հասցեներ կլինեն, այնքան շատ սարքավորումներ, տվիչներ, ձեր վրա գտնվող իրեր կլինեն, իրեր, որոնց հետ դուք այնպիսի փոխազդեցության մեջ կլինեք, որ այլևս չեք զգա դրանց գոյությունը»,- ապագայի գլոբալ ցանցի մասին խոսելով` ասել է Էրիկ Շմիդտը: Նա ուշադրություն է հրավիրել բազմաթիվ հզոր տեխնիկական հարթակների առաջացման վրա, որոնք ազդում են «դոմինավորման կարգավորման» վրա: Նա նաև հավելել է, որ ներկայում բոլորովին անհնար է կանխատեսել, թե ինչ տեսք կունենան բջջային հավելվածների ենթակառուցվածքները, քանի որ ոլորտում նոր խաղացողներ են ի հայտ գալիս, որոնք ոչ այլ ինչ են, քան սուպերհամակարգիչներ: «Ներկա պահին ինձ համար այդ ոլորտը բացարձակապես բաց է»,- ասել է Էրիկ Շմիդտը: