Իրադարձություններ

«Եթե նույնիսկ արդյունք էլ չտա էս ամեն ինչը, գոնե թող ձեր աշխատավարձերը բարձրացնեն»,- կառավարության 3-րդ մասնաշենքի դիմաց, դիմելով ոստիկանության աշխատակիցներին, ասաց Նիկոլ Փաշինյանը՝ անելով մի բացահայտում: Նա պատմեց, որ իր ընկերը պատմել է, որ իր տանը շինարարական աշխատանքներին մասնակցում էին նաև ոստիկաններ, ովքեր իրենց ընտանիքները պահելու և գումար վաստակելու համար շաբաթ-կիրակի աշխատում են.

«Ձեր ղեկավարությունը չգիտի՞, թե շաբաթ օրերը, աշխատանքից հետո ինչով եք զբաղվում, որ մի երկու կոպեկ փող աշխատեք»,- շարունակեց նա՝ հավելելով. «Սերժ Սարգսյանի հույսն էն ա, որ էս շարժումը մարի, բայց ասեմ՝ էդպես չի լինելու»:

Նա դիմելով ոստիկաններին՝ կոչ արեց միանալ իրենց. «Ես չեմ ասում հենց հիմա սաղավարտները վայր դրեք, բայց մտածեք: Ուզում եմ նաև իմանամ՝ ձեր ընտանիքները համաձա՞յն են, որ դուք այս սաղավարտները հագած վտանգում եք ձեր կյանքը՝ պաշտպանելով կոռումպացված Սերժ Սարգսյանի անվտանգությունը: Ձեր մայրերի, հայրերի, ձեր երեխաների հետ խորհդակցեք, համաձա՞յն են...իշխանությունները միլիոնատեր են դառնում, իսկ դուք շաբաթ-կիրակի ցեմենտ-բետոն եք անում, մտածեք իրավիճակի մասին»:

Ցուցարարները վանկարկում են՝ «Քայլ արա, զենքդ դիր վայր»:

Նիկոլ Փաշինյանը կոչ արեց կառավարության աշխատակիցներին՝ ներքին ստորագրահավաք սկսել առ այն, որ իրենք չեն հնազանդվում, չեն ճանաչում Սերժ Սարգսյանի իշխանությունը, և ճանաչում են համաժողովրդական շարժման իշխանությունը: