Իրադարձություններ

SHAMSHYAN.com-ի տեղեկություններով՝ երեկ արտակարգ դեպք է տեղի ունեցել ՀՀ Արդարադատության նախարարության «Արմավիր» քրեակատարողական հիմնարկում: Այնտեղ գտնվող կալանավոր Արթուր Սաֆարյանը ինքնավնասում է կատարել, ինչի հետևանքով էլ բանտապետի ժամանակավոր պաշտոնակատար փոխգնդապետ Խաչիկ Հարությունյանի որոշմամբ՝ (քանի որ բանտապետ Տիգրան Նավասարդյանը գտնվում է ամանորյա արձակուրդում) տեղափոխվել է մենախուց: Աղբյուրի տեղեկություններով՝ պատճառն այն է, որ բանտում իրենց արտոնյալ համարող դատապարտյալներ Էդգար Սիմոնյանն ու Սպարտակ Դանիելյանը ծեծի են ենթարկել Ա. Սաֆարյանին՝ ստիպելով որ նա տեղափոխվի այլ տեղամաս: Նրանք իրենց համարում են ոչ միայն 6-րդ տեղամասի «զոն նայող», այլև բանտի աշխատակիցներին կարողանում են իրենց «բռի մեջ» պահել, SHAMSHYAN.com-ի հետ զրույցում ասել են բանտարկյալների մի քանի հարազատներ: Ամանորից առաջ նրանք նաև ծեծի են ենթարկել 6-րդ տեղամասի 603 խցի բանտարկյալներից մեկին, ով ցմահ ազատազրկված է: Այս պահին էլ լարված իրավիճակը «Արմավիր» քրեակատարողական հիմնարկում շարունակվում է, սակայն Արդարադատության նախարարության կալանավայրերի վարչությունը, կարծես, չի տիրապետում օպերատիվ իրավիճակին ու միջոցներ չի ձեռնարկում դրությունը շտկելու ուղղությամբ: «Դատապարտյալների հիվանդանոց» ՔԿՀ-ում (ժողովրդին հայտնի՝ ՑԲ-ում) մահացել է նաև 42-ամյա կալանավոր Մհեր Խերունցն, ով առողջական խնդիրներ է ունեցել, և ըստ դատաբժշկի նախնական եզրակացության՝ նա մահացել է սրտանոթային անբավարարությունից: