Իրադարձություններ

«Հայաստանի մշակույթի օրեր»-ի շրջանակում Երևանի մնջախաղի պետական թատրոնը հանդես կգա Ռուսաստանի երեք քաղաքներում. նոյեմբերի 18-ին՝ Եկատերինբուրգում, 19-ին՝ Չելյաբինսկում, 21-ին՝ Զլատոուստում։ Մշակույթի նախարարության փոխանցմամբ` թատրոնը երկուական սեանսով կներկայացնի «Խաղ» ներկայացումը, որը Ռուսաստանի Տյումեն քաղաքի «Կենդանի դեմքեր» երիտասարդական թատերական 9-րդ փառատոնից հոկտեմբերին վերադարձավ հատուկ մրցանակով: Մրցանակակիրը թատրոնի դերասանուհի Նաիրա Եդիգարյանն է՝ «Լավագույն կին դերակատար» անվանակարգում:

     Մնջախաղի թատրոնի գեղարվեստական ղեկավար Ժիրայր Դադասյանի բեմադրած այս ներկայացման հիմքում արքայի և պարուհու մասին արևելյան լեգենդն է, որում միահյուսվում են սերը, դավաճանությունը, հիասթափությունն ու մահը:
     «Գունեղ, դիտարժան ներկայացում, որը Տյումենում արդեն արժանացել է ոչ միայն ռուսաստայնան հանդիսատեսի, այլև բծախնդիր քննադատների հավանությանը»,- ասում է Դադասյանը: Նա նաև ընդգծում է, որ ռուսաստանցի թատերագետներից շատերն իրենց զարմանքն են արտահայտել, որ Հայաստանն ունի մնջախաղի թատրոն, այն էլ՝ պետական. «Մնջախաղի պետական թատրոն՝ ազգային ինքնատիպ դիմագծով. Երևանի մնջախաղի թատրոնը բացառիկ երևույթ է: Նման թատրոն չունի անգամ Ռուսաստանը»,-թատերագետների տեսակետն է փոխանցում Դադասյանը: