Շենգավիթ վարչական շրջանի ընդհանուր իրավասության դատարանում Ժիրայր Սեֆիլյանի գործով դատավարությանը պաշտպան Արա Զաքարյանը դատարանին միջնորդեց ապահովել իր պաշտպանյալի ներկայությունը դատարանում: Նախագահող դատավոր Տաթևիկ Գրիգորյանը նշեց, որ միջնորդությունը կբավարարվի միայն այն դեպքում, եթե ամբաստանյալները կարողանան պահպանել էթիկայի տարրական կանոնները՝ հարգեն դատարանին, ոտքի կանգնեն, անհարկի արտահայտություններ չհնչեցնեն:
Փաստաբան Արա Զաքարյանը հայտնեց. «Մեկ րոպե անգամ առանց իմ պաշտպանյալի չեմ մնա դատական նիստերի դահլիճում, քանի որ իմ պաշտպանյալից հանձնարարություն ունեմ առանց նրա ներկայության դատավարական գործընթացին չմասնակցել»:
Նախագահող դատավորն արձագանքեց. «Դուք իրավունք չունեք կատարելու Ձեր պաշտպանյալի անօրինական հանձնարարությունները»:
Արա Զաքարյանը լքեց նիստերի դահլիճը: Նույն պատճառաբանությամբ դատական դահլիճը լքեց նաև Ներսես Պողոսյանի պաշտպանը՝ Նինա Կարապետյանցը: Դատարանը հեռացել է խորհրդակցական սենյակ՝ սանկցիա կիրառելու մասին որոշում կայացնելու: Նշենք, որ դատական նիստերի դահլիճում մեկ ամբաստանյալ էր ներկա, քանի որ նախորդ նիստին դատարանը 10 ժամով դատական նիստերի դահլիճից հեռացրել էր Գևորգ Սաֆարյանը, Ժիրայր Սեֆիլյանը, Ներսես Պողոսյանին և Հրայր Թոփչյանը:
Հիշեցնենք, որ Ժիրայր Սեֆիլյանին և մյուսներին մեղադրանք է առաջադրվել մի խումբ անձանց հետ նախնական համաձայնությամբ, 24.04.2015 թվականին Երևան քաղաքում բռնություն գործադրելով, գույք ոչնչացնելով և վնասելով, ինչպես նաև իշխանության ներկայացուցչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, 2014 թվականի մայիսից դրա կազմակերպմանն ուղղված նախապատրաստական գործողություններ կատարելու համար: